तपाईंसँगै जाने चाहिँ को हो ? - दानियल भट्ट

धेरै वर्ष अगाडिको कुरा हो कुनै एउटा मानिसको चारवटी श्रीमतीहरु थिए । उसले सबैभन्दा बढी आफ्नी कान्छी श्रीमतीलाई माया गर्थ्याे । उसकी साहिली श्रीमती चाहिँ एकदमै राम्री थिए तर पनि बढी माया चाहिँ उसले कान्छीलाई नै गर्थ्याे । उसकी माहिली श्रीमती साह्रै नै प्रेमिलो थिई । तर सबैभन्दा पहिले बिहे गरेको उसकी जेठी श्रीमतीलाई भने उसले कुनै वास्ता गरेको थिएन । उमेर बित्दै जाँदा एकदिन त्यो मानिसको मर्नेबेला आयो । तर ऊ एक्लै मर्न चाहँदैनथ्यो । त्यसैले उसले आफूले धेरै माया गरेकी कान्छी श्रीमतीलाई भन्यो, “हे मेरी प्यारी श्रीमती हेर मैले मेरो जीवनमा सबैभन्दा बढी तिमीलाई माया गरेको छु, अब मेरो मर्नेबेला आयो के तिमी मसँगै जान चाहन्छ्यौ ?” कान्छी श्रीमतीले भनी, “नाइँ म तपाईंसँग जान सक्दिन ” उसले फेरि सबैभन्दा राम्री श्रीमती साहिलीलाई सोध्यो, “म अब मर्न गइरहेको छु के तिमी मसँग जान चाहन्छ्यौ ?” साहिलीले भनी, “म त यति राम्री छु मैले अर्काे श्रीमान पनि पाईहाल्छु नि, म तपाईंसँग जान सक्दिन ।” त्यसपछि उसले आफूलाई धेरै माया गर्ने माहिली श्रीमतीलाई बोलाएर भन्यो, “म अब मर्न लागिरहेको छ, के तिमी मसँग जान्छ्यौ ?” माहिलीले पनि भनी, “तपाईं जिउँदो छँदा पो मैले तपाईंलाई प्रेम गरे तर अब म तपाईंसँग जान सक्दिन ।” अन्तमा उसको पछाडि मसिनो स्वरमा उसलाई बोलाउँदै उसकी जेठी श्रीमती आइपुगी र भनी, “म चाहिँ तपाईंसँग जान चाहन्छु ।” त्यो मानिसले उसकी जेठी श्रीमतीतिर फर्केर हेर्यो किनभने उसले आफ्नी जेठी श्रीमतीलाई यति हेँला गरेको थियो कि कहिल्यै पनि फर्केर उसको मुखमा हेरेको थिएन । उसकी जेठी श्रीमती साह्रै दुब्ली र पातली थिई, हेला गरिएकी थिई । तर पनि अन्त्यमा उसँग जानको लागि उसकी जेठी श्रीमती मात्रै तयार भई प्रिय मित्र तपाईंको कान्छी श्रीमती भनेको तपाईंको शरीर हो जसलाई तपाईं धेरै माया गर्नुहुन्छ, तपाईंको साहिली श्रीमती चाहिँ धनसम्पत्ति हो, जुन साह्रै सुन्दर देखिन्छ । तपाईंको माहिली श्रीमती चाहिँ तपाईंका आफन्तहरु हुन् जसले तपार्इंलाई खुबै माया देखाउँछन् । तपाईंको जेठी श्रीमती चाहिँ तपाईंको आत्मा हो । तपाईं मर्नेबेलामा तपाईंको शरीरले तपाईंलाई छाड्छ, धनसम्पत्तिले तपाईंलाई साथ दिँदैन ।
 आफन्तहरु माया गरिटोपल्छन्, अझ कति जना त आफन्तकै कारण, आफ्नै श्रीमान वा श्रीमतीको कारण वा बाबुआमाको कारण आत्माको वास्ता गर्दैनन् । तर मर्ने बेलामा वा तपाईं मरेपछि तपाईंसँग हुने केवल तपाईंको आत्मा मात्रै हो । यसकारण के तपाईंको आत्मा बाँचेको छ वा के तपाईंले आत्मा बचाउँनको लागि येशू ख्रिस्टमा विश्वास गर्नुभएको छ ? यदि तपाईंले येशूलाई विश्वास गर्नुभएको छ भने के तपाईं दैनिक रुपमा भोजन खाएझैं बाइबल पढेर प्रार्थना गर्नुहुन्छ ? आउनुहोस् मित्र आजै देखि आफ्नो आत्माको वास्ता गरौं हरेक दिन बाइबल पढ्ने वचनहरुमा ध्यान गर्ने र प्रार्थना गर्ने बानी बसालौं । “सारा जगत प्राप्त गरेर पनि आफ्नो प्राण गुमायो भने मानिसलाई के लाभ हुन्छ अथवा मानिसले आफ्नो प्राणको सट्टा के दिन सक्छ ?” (मत्ती १६ः २६) ।